2010-08-18

الحلقة 5
كان على الكردفاني هذه المرة ان يتوجه الى القضارق للبحث عن حلول ناجعة لقضيته الطويلة .. ولكن هناك ما يحول دون سفره .. نقص المال والخبز لاولاده .. كنت بدات اري شخصا اخر غير الذي اعرفه .. نعم بدأت اري وجه تازارا ..ذلك الرجل الذي ذكره الكسندر دوماس في رواية الكونت دي مونت كريستو .. تازارا الرجل المتعطش للانتقام والدماء .. نعم كنت اري ان الكردفاني حاد عن هدفه الاساسي وهو البحث عن لقمة عيش تحت لواء نقابة التحميل والتفريغ وهو اسم الدلع لنقابة العتالة ...
كنت اجلس كالعادة في مقهي الفيشاوي اطل علينا الكردفاني عارضا قضيته وطلب من الجميع مساعدته وعونه بجمع مبلغ اربعين جنيه منها عشرين جنيه ثمن التذكرة ذهابا وايابا الى القضارف وعشرة جنيه مصاريف وعشرة جنيه اخيرة يتركها مع الابناء للمعيشة ...
تبرعت للكردفاني بربع شوال بفرا (كسافا) محمد عيد منح الكردفاني خمسة فافايات يعادل ثمنها اربعة جنيه ومجموعة من ربط النعناع التى اثر الكردفاني تركها في منزله وعدم عرضها للبيع اما ادم بوش فتبرع بثلاثة ربط من القنا ..وصديقنا الشيخ محمد جمال الدين فساهم نقدا بمبلغ 23 بر اثيوبي ..
ربط محمد عيد تبرعه بالتزام الكردفاني بعدم بطلب رقم موبايل الرئيس اطلاقا في المزرعة .. فكان محمد عيد كما ذكرت لكم سابقا يعتقد ان طلب رقم موبايل الرئيس ضد امن البلاد والعباد ..
غادر الكردفاني الى القضارف وربك عارف .. ثم جاءنا بعد ثلاثة ايام ... كانه خارج من حفر قبر هيئته لاتسر ولاتفرح.. فادركنا ان صاحبنا لم يجد ضالته سالته عن الخبر ...
قال بائسا : والله يا جماعة البلد دي الا تتمرد وتشيل السلاح حتى الناس يسمعوا كلامك ..
قال محمد عيد : يا الكردفاني دا كلام خطير .. انت بقيت تتطور .. انت الكلام بتاعك دا ضد امن البلد ..
قال الكردفاني بضيق : شنو يامحمد عيد .. اي حاجة انا اقولها انت تقول ضد امن البلد .. انا داير اشتغل عتالي زي زي الناس البتشغل عتالة في كل العالم  .. يعني شغل العتالة ضد امن البلد ..
قلت للكردفاني : شنو الحصل ..
قال : مشيت لى مكتب العمل في مدينة القضارق .. ناس مكتب العمل قالو لى انت ناس النقابة ديل شغالين معاك وانت بتتدفع ليهم الرواتب .. قلت ليهم لا .. وقالوا لى انت شغال مع الناس ديل وهم بيدفعوا ليك الرواتب قلت ليهم لا .. ناس مكتب العمل قالوا اختصاصنا فقط في القضايا بين العمال وارباب العمل ..وقالوا لى لما تعمل شركة وتحصل ليك مشاكل مع العاملين تعال لينا ..
ضحك ادم بوش وقال : يا كردفاني حكايتك دي فيها كجركة شديدة طيب ح تعمل شنو
قال والله يا ادم ح اسافر الى بورسودان لى مقر اتحاد نقابات الشحن والتفريغ واشكوا جماعنتا ديل ال مافي زول قادر عليهم الا الله ..  هناك وهم ح يحلوا لى المشكلة .. المرة دي عايزين تبرعات تقيلة البافرا والنعناع دي ما بتنفع معانا .. عايزة خمسة شوال سكر المرة دي يعنى باختصارر عايز 500 جنيه ..
قلت له : يا الكردفاني المرة دي ما عندك حلل الا تحفر مترين في بير المزرعة .. وتاخد قروشك وتتوكل على الله بعد داك الى  بورسودان ..
قال الكردفاني ضاحكنا : يا ابو لؤي انت بتقول لى اترشح لى رئاسة الجمهورية .. طيب لو اترشحت لى رئاسة الجمهورية ح احفر كم متر عشان مصروفات الانتخابات .. 600 متر ما ح تكفي .. قال شافيز قال ..
الى اللقاء 
---


الحلقة الرابعة
2010-08-11
معتمد القلابات الشرقية حضر لحلحلة المشكلة القائمة بين الخضر (بضم الخاء)والكردفاني .. والخضر ايها السادة ليس المنتخب الجزائري ..انما هم اعضاء نقابة العتالة .. واشتهروا بهذا الاسم لملبسهم الاخضر الانيق .. جلس المتعمد والى جواره الكردفاني وعلى يسارة اعضاء النقابة ..
المتعمد عندما تجلت له الحقيقة وبان صدق الكردفاني .. وبخ اعضاء النقابة وطالبهم باعادة كل الاعضاء المفصولين للعمل ثانية بما فيهم شيخ البلد شيخ بحر ... اعضاء النقابة شكروا المعتمد على سعيه الجاد لحلحلة الاشكال ..وذكروا له ان الحكومة لو حلحلت الاشكالات الصغيرة كالتي يعاني منها الكردفاني ..لما قامت المشاكل الكبري  في دارفور وغيرها ..
وفي النهاية وضع المعتمد خطة بان تكون هناك دورة كالدورة الزراعية يتحول كل عتالي من منطقة الى اخري حتى يكون الجميع سواء وحيث ان الكردفاني تم ركنه في موضع عتالة القنا وهو اسوأ مكان من حيث العائد المادي .. فامام الكردفاني الان فرصة عظيمة للعمل قطاع تحميل البان حيث الاموال تتدفق زرافات وغزلانا..
ذهب المعتمد الى دوكة عاصمة القلابات الشرقية .. وصاحبنا الكردفاني كان في غاية السرور والفرح .. والغريبة ان اعضاء النقابة كانوا ايضا في غاية السرور الفرح ...
مرت اسبوعين وهي الفترة التي حددها المعتمد والتى يحل بموجبها الكردفاني على قطاع البان الحبشي حيث العائد الوفير  ... جاءنا الكردفاني ذات مساء ونحن جلوس في قهوة الفيشاوي كالعادة وكان غضبان والشرر يتطاير من عينيه ..
سالته : شنو الحاصل ياكردفاني ..
اجاب :اعضاء النقابة رفضوا ينفذوا قرار المتعمد ..
سالته : ليه 
قال : اعضاء النقابة قالوا رئاسة الجمهورية قبل كدة اصدرت قرار يمنع اخذ الجبايات والرسوم في الطرق السريعة .. والمسئولين في الطرق السريعة ضربوا بالقرار عرض الحائط .. ومواصلين جمع الجبايات والرسوم ..اذا كان موظفين الحكومة بيضربوا بقرار رئاسة الجمهورية عرض الحائط ليه نحنا ما نضرب بقرار المعتمد عرض الحائط خاصة ونحنا ما موظفين حكومة ..
الكردفاني عاد الى المتعمد مرة ومرتين وابلغه بقرار اعضاء النقابة ورفضهم تنفيذ امره .. وعندما تكررت زيارات الكردفاني الى دوكة ضاق المعتمد  بالكردفاني ذرعا  وطالبه بالذهاب الى جهات الاختصاص المنوط بها حل اشكال 
الكردفاني رد علية : انا مشكلتي دي لو عندها جهة اختصاص عشان تحلها لى ما كان جيتك ...
ادرك الكردفاني بحسة الريفي البسيط ان مشكلته اكثر تعقيدا مما يتصور .. وان الحكومة جعلت في مدينة القلابات كل جهات الاختصاص لحل المشاكل الا انها اغفلت في ان تجعل لمشكلة الكردفاني حلا ..

داعبت الكردفاني قائلا : لما تمشي للمعتمد المرة الجاية قول ليهو الدول لما تكون ما عندها سفارة في بلد معين تكلف سفارة دولة اخري بالقيام برعايا مصالحها وهو ما يعرف بالاحلال السياسي .. يعنى ممكن الشرطةاو الجيش او اي مصلحة حكومية ترعى مصالح محكمة العمل

رد الكردفاني قائلا : اولا المعتمد قال مادايرني اجيهو في دوكة تاني ...
----
الحلقة 3

2010-08-07

في رواية نهر الدون الهادي تختفي شخصية استوكمان في نهاية الجزء الثالث لتظهر بدلها  شخصية شيماك هذا الضابط المتحمس للثورة البلشفية ليواصل مسير النضال دون كلل او ملل وينقذ مدينة بترو بورغ من براثن الجيش الابيض.. الكردفاني  المتحمس لقضيته العادلة يواصل السعي الدؤوب وحده دون ان تحل شخصية اخري محله  من اجل الوصول الى حل  نهائي وحاسم .. ويتجه صوب مكتب معتمد القلابات الشرقية بعدما فقد الامل في وجود نصير لقضيته في مدينة القلابات .. فيما سبق ذهب الكردفاني الى شرطة القلابات وقابله الضابط بود وترحاب الا انه اعتذر وطالبه بالذهاب الى النيابة.. وقال له الضابط :اذا تعرضت الى اي من الجرائم التى تستدعى القبض دون امر قبض من النيابة تعال لى ..

توجه الكردفاني نحو دوكة كما حدث للقس استفن كومالو في قصة ابكيك يا وطنى العزيز .. كان الكردفاني يبحث عن منصف وكان القس ستيفن كومالو يبحث عن مومس .. النيابة اعتذرت  لعدم الاختصاص .. وقال له وكيل النيابة  :اذا عندك اي قضية خلاف قضايا مكتب العمل تعال لي اما موضوعك مع  العتالة حلو بعيد عني ..

عاد الكردفاني ثانية الى القلابات وذهب الى ضابط محلية القلابات وعرض قضيته المعقدة .. ضابط المحلية اعتذر  لعدم الاختصاص لكنه قال للكردفاني : اذا عندك اي مشكلة بخصوص الرخص والعوائد تعال لي ..

الكردفاني توجه الى قائد حامية الجيش في مدينة القلابات قائد الحامية اعتذر بلباقة واحترام بعدم الاختصاص ولكنه قال للكردفاني: اذا شعرت باي عدو قادم للبلاد نحن جاهزون بالروح والدم ..

الكردفاني لم يفقد الامر توجه هذه المرة الى الدكتور المسئول عن البطري وصحة الحيوان .. الدكتور اعتذر للكردفاني بعدم الاختصاص ولكنه قال : والله يالكردفاني لو عندك اي بهيمة كاسرة ركبة او حاتة بلالي ضراع نحنا جاهزين ..

اخيرا توجه الكردفاني الى مركز فحص الايدز بعدما استنفذ كل الجهات الحكومية ..

الفحيص قابله بترحاب وقال له : يا الكردفاني انت زول ملتزم .. لى شنو عايز تفحص الايدز

اجاب الكردفاني : الحمد لله انا ملتزم ما داير افحص الايدز لكن عندي مشكلة مع العتالة طردوني من النقابة

الفحيص : يعني عايز تفحص لاعضاء النقابة الايدز

الكردفاني : اعضاء النقابة نصيحين لو دقشوا الجبل دا يهدوه

الفحيص: طيب دايرني  لى شنو

الكردفاني : والله داير اكمل اي مسئول هنا في الحكومة عشان لما اقابل المعتمد اقول ليهو قابلت اي زول في الحكومة وما انصفني ..

كل مساء اجلس عادة انا وادم بوش والشيخ جمال الدين ومحمد عيد في قهوة حامد التى اسميها انا بقهوة الفيشاوي .. جلس الكردفاني يحكي لنا المأساة والمعاناة التى يجدها..

قلت للكردفاني ثاينة : لازم تخوض انتخابات الرئاسة صدقني ان الحماسة التى تحملها ستجعل تفوز مافي زول ح ينصفك الا تنصف نفسك بنفسك ...

وذكرت له مسيرة قائد فينزويلا شافيز .. ضحك الجميع

وقال الكردفاني ساخرا : والله يا ابو لؤي انا عشرين عتالي جهجهوني ووقفوني على رجل واحدة طيب لو حكمت اربعين مليوني ديل ح يخلوني كسيح عديل ..

واصل الكردفاني قائلا بجدية :كل المسئولين يقولوا نحنا ما مختصين .. اسع لى شلت عكاز ووقعت في اعضاء النيابة دق وضرب وفشيت مغصتي .. كل الناس دي ح تقول نحنا مختصين نحنا مختصين .. حتى الفحيص بتاع الايدز ح يقول انا مختص .

في اليوم التالي انبهرت مدينة القلابات فقد جاء الكردفاني مصحوبا بمعتمد محافظة القلابات الشرقية .. جاء المعتمد لحل مشكلة الكردفاني  مع نقابة العتالة ..

----

الكردفاني يبحث عن القصر الجمهوري 2

.2010-06-27

قسم مخائييل شلوخوف روايته نهر الدون الهادي الى اربعة اجزاء كبيرة ووضع شخوصا كثيرة يتناولها بالتفصيل والتدقيق والمتابعة .. حيث ان ابطال قصته فوق الخمسين بطل .. تتداخل وتتمزق الشخصيات بعضها فوق بعض .. حازيا خزو الروائيين الروس العظماء امثال ليو تلستوى في قصة الحرب والسلام وفيودور دوستفيسكي في رواية الاخوة كرامازوف وايفان  وتورجنيف في رواية اسيا  .. ولكن مخائيل شولوخوف في روايته التى حصل بها علىجائزة نوبل للادب يتطرق لشخصية استوكمان ذلك الحداد القادم من سان بطرسبيرج والذي يرتمي في حضن الحزب الاشتراكي الديمقراطي وسيعرف بعد قيام الثورة بالحزب الشيوعى الروسي ..

استوكمان صاحب اراء غريبة وجريئة وقوية مختلفة عن مجتمع نهر الدون القوزاقي الفلاحي البسيط  الموالي للقيصر دائما..هكذا كان الكردفاني رجل يغلى كالقدر المحترق في مجتمع القلابات الهاديء .. صاحب اراء ارتجالية صلبة وحادة .. حكاية الكردفاني بسيطة وغير معقدة بدات هكذا .. اجتمع الحمالين او العتالة في مدينة القلابات وقرروا تاسيسي نقابة .. تسمي نقابة عمال الشحن والتفريغ .. وعمل النظام الاساسي واجيز ..وسجلت النقابة لدي جهات الاختصاص الحكومية .. عمال الشحن فعلوا ما فعلته الطائفة الدرزية في لبنان حيث لايبيح قانونها الجديد بقبول عضوية جديدة خارج نطاق الطائفة .. العمال قرروا عدم قبول اعضاء جدد حتى ياخذوا الجمل بما حمل .. الا هنا فالامر برمته في مصلحة الكردفاني ... اعضاء النقابة بداوا يتحكمون في اسعار التزيل والتحميل .. ولايستطيع احدا مناقشتهم فلا يحق لعضو  خارج نطاق النقابة العمل بقوة القانون .. ارتفع معدل الدخل اليومي واصبحوا من الاثرياء .. طمع بعضهم (اي الحمالين)وعملوا تكتيكات تحت تحت واخرج الكردفاني وبعض الاعضاء .. معظم الخارجين او المرفودين من النقابةرضوا بقسمتهم الا شخص واحد يحمل نفس طباع استوكمان وجراته قرر المجابهة والمواجهة وهو بالطبع الكردفاني ..

في زيارتي الاخيرة الى قلابات التقيته وجلسنا سويا امام بركة ماء نتحدث ونتجاذب اطراف الحديث كعادتنا ..سالني عن موقع القصر الجمهوري فهمت انا ان الرجل يتكلم بالتورية والاستعارة وماشابه ذلك وادركت ان الرجل يريد ان يخوض الانتخابات الرئاسية فمسيرة الرئيس خوجو شافير تحمل نفس المنحنى .. فهو لا يسأل عن البقصر الجمهوري كمكان انما يسال عن طريقة الوصول الى سدة البحكم كهذا اعتقدت ..

قلت له مداعبا :ح تخوض الانتخابات الرئاسية ياكردفاني ..

الكردفاني تنحنح وقال : والله يا ابو لؤي البركة الصغيرة دي انا ما بقدر اخوضها كيف ح اخوض انتخابات زي دي ..

قال محمد عيد ساخرا :الكردفاني حق المواصلات للقضارف ماعندو كيف ح يقدر يحوم السودان كله ..

امن كردفاني على كلام محمد عيد وطلبت منه انا وبحكم ان المشكلة بسيطة لا تستدعى كل هذا الجهد طلبت منه ان يقابل شيخ الحلة شيخ بحر وكنت اعرف سلفا ان شيخ مدينة القلابات يعمل عتالي ..

الكردفاني جر ضحكة طويلة كعنق الزرافة وقال : شيخ  بحر فصلوا زينا .. هو ماقادر يحل مشكلته كيف يحل مشكلتنا  ..

الى اللقاء

---

الكردفاني يبحث عن القصر الجمهوري..1

2010-06-20

الكردفاني رجل بسيط يعيش  في القلابات في الشرق الادني لحدود السودان والحبشة .. قاد نضالا طويلا ومحكما اشبه بنضال كريكوي في رواية نهر الدون الهاديء..المهنة التى يمتهنها هذا الرجل هي مهمنة العتالة ..العلاقة التى بيني وبينه اشبه بتلك العلاقة بين مليخوف وكريكوي في ذات الرواية غير مستوية وتمر منعرجات كبيرة ..

ذات يوم بينما كنت جوار البير وانا احاول اصطياد ورل يعوم في مياهها جاءني الكردفاني وبدا يحكي لى رواية  يدور محورها عن العتالة وتنزيل البان الحبشي والمشاكل التى تواجههم .. بينما انا منشده البال ومركز اهتمامي كله بصيد الورل طلبت منه ان يساعدني ..اخذني جانبا وقال القلابات كلها وورلات (جمع ورل) بكرة انا ح اجيب ليك اثنين وانا جاي ..دايرك ضروري انس الورك ربنا يعوضك فيهو ..

تركت الورل جانبا واصغيت لهذا الرجل كان على ان اتعامل معه كما يتعامل كريكوي مع اورنين  بحذر شديد ووشيك قال لى : انا عايز رقم موبايل الرئيس

قلت له : ياتو رئيس

قال : الرئيس الواحد دا في غيروا..عايز تلفون  البشير

قلت : ياكردفاني الله يهديك ..لو انا مابعرفك انت زول صلاة وبتخاف ربنا كنت قلت انت مشيت الحبشة سكرت وجيت

المشكلة ان الكردفاني بحسه البسيط اعتقد بانني ابيع الشرايح .. وان الرئيس البشير بجلالة قدره ترك القصر الجمهوري بما فيه من وزراء وسفراء وكبار القوم .. ترك كل هؤلاء وتوجه الى شركة ثمار جوبا ووقف امام العبد لله طالبا شراء رقم موبايل مميز .. وبما ان شركة ثمار جوبا لم تستقبل طول حياتها من علية القوم الا حبينا عزام صابونة مدير مبيعات ام تى ان ودكتور على يعقوب -بالمناسبة الى مرتادي الموقع ماهي اخر اخبار دكتور على يعقوب- وتحركت ماكينة الدماغ عند الكردفاني وظن ان وجود البشير في شركة ثمار جوبا هو حدث كبير بذاته وانني بعد ان سلمته الشريحة طبعا رفعت السعر لعدة ملايين واخذت الرقم لزوم الاتصال عليه اي الرئيس فيما بعد .. وانني لن ابخل عليه اي الكردفاني في اعطاءه رقم البشير للاتصال عليه وذلك لوجود اشكال كبير بينه العتالة في مدينة القلابات لن يحله الا البشير نفسه

قلت للكردفاتي مستعيرا نفس اللجهة من المخاطبة بين كريكوي ومليخوف : ياكردفاني الله لايكسبك ضيعت مننا الورك .

كنت لاحظت ان الورل جفل وولى الادبار وكتب له عمرا جديدا لانني كنت اريد ان اضعه في مائدة الغداء ..

ففي تلك اللحظة جاءني عامل المزرعة محمد عيد متسائلا انت كنت اصطدت الورك واضاف انه عمل كل التجهيزات اللازمة لطبخ الورك ..اوضحت لمحمد عيد ان الورل هرب لان الكردفاني لهاني بطلب رقم موبايل الرئيس .

عندها خاطب محمد عيد الكردفاني قائلا محذرا : ياكردفاني انت لسع بتطلب رقم البشير .. انت عايز ناس الشرطة يقول عننا شنو وانت تسال عن الرقم .. رجاءا الرقم دا ما تسال عنو هنا في المزرعة امشي اسال عنو بعيد من هنا .. ما تدخلنا في احراجات مع ناس الشرطة ..

وخاطبني محمد عيد : الكلام بتاع الكردفاني دا خطر ضد امن البلد ..وح يجيب لينا مشاكل مع ناس الشرطة ونحنا ما ناس بتاعين مشاكل  .

كنت اعرف ان محمد عيد رجل بسيط ولا يريد اي نوع من مشاكل ..

هذا الحوار كان قبل ثلاثة سنوات .. في سفرتي الاخيرة الى قلابات قبل اسبوع قابلني كردفاني في القهوة ..

الى اللقاء .